www.akimvko.gov.kz | Дошкольное воспитание

ШҚО мектепке дейінгі білім беру жүйесінің 2008 жылға ахуалы туралы
А Қ П А Р А Т

Әлемдегі білім беруді дамытудың негізгі индикаторларын жүзеге асыру, балаларды мектепке дейінгі білім берумен қамту, Қазақстан Республикасы Үкіметінің 05.02.2007ж. №83 «Қазақстан Республикасында 2007-2010 жылдары мектепке дейінгі оқыту мен тәрбие беруді қолдау жөніндегі шаралар Жоспарын бекіту туралы» қаулысын жүзеге асыру мақсатында білім Департаменті атқарушы органдармен бірлесе отырып, айтарлықтай жұмыстар жүргізді.
2008 жылғы 15 маусымға облыста 17997 баланы қамтыған 100 мектепке дейінгі ұйым, 10969 баланы қамтыған 430 шағын-орталық жұмыс істейді. Бұл өткен жылмен салыстырғанда 15 балабақшаға көп. Балаларды мектепке дейінгі білім берумен қамту 2006 жылға қарағанда 18,3% арттырылып, 1-6 жас аралығындағы барлық балалардың 51,1% құрады. Қазақ тіліндегі мектепке дейінгі ұйымдар 13 бірлікке көбейтіліп, 28 балабақшаға дейін жеткізілді. Ал, 2006 жылы 15 балабақша болған.
Соңғы үш жылдың ішінді облыста 27 балабақша ғимараты қалыпқа келтірілді. Шаруа қожалықтары және Тарбағатай ауданындағы 1 жекеменшік иесі 7 ғимаратты қайтарып берді. Семей қаласында Казахмыс кәсіпорны жеке балабақша ашты.
Шығыс Қазақстан облысы әкімі жанындағы Үйлестіру кеңесінің отырысында мемлекеттік мекемелер мен жекеменшікке берілген бұрынғы балабақша ғимараттарына, Өскемендегі ғимараттарға тексеру жүргізген жұмыс тобының есебі тыңдалды. Жекеменшік иелерімен кездесу өткізіліп, олардың екеуі өз нысандарын сатуға тілек білдірген.
Ульянов көшесіндегі №13 мектепке дейінгі мекеменің ғимараты 100 орындық балабақшасына қайта жабдықталды. Семей қаласында жекеменшікке алынған балабақша жөнделіп, өз профилімен жұмыс істеуде. Осындағы 7 балабақша иесімен қайтадан сату мүмкіншілігі жөнінде алдын ала келіссөз жүргізілген.
Катонқарағай ауданында «Жас қанат» ш/қ басшысы А.Матасов, «Найман» ш/қ басшысы Ж.Старшинаев, Мәйемер аулындағы кәсіпкер А.Бұлғыновпен жекеменшіктегі ғимараттарды қайтару мәселесі шешілуде.
Ұлан ауданында мектепке дейінгі мекемелерді дамытуға 50,7 млн. теңге бөлінген. Таврия ауылында мектеп үйін кешенді- мектеп балбақшаға қайтадан ұйымдастыру ұйғарылып отыр. Өскеменде 800 орындық 3 балабақша ашылмақшы. Бұған бөлінгені- 80 млн. теңге.
2008 жылдың қаңтар айында балабақша ақысын төмендету мәселесі қаралған болатын. Қазір Өскеменде ата-аналар 6 мыңнан 7800 теңгеге дейін төлейді. Ал, желтоқсан айында бұл 11-12 мың теңге болған. Семейде- 6 мың теңге, Риддерде-5500 теңге. Мамыр айында мектепке дейінгі ұйымдарды азық-түлікпен өзіндік құны бойынша қамтамасыз ету мәселесі қаралды.
Мектепке дейінгі ұйымдарды 2009-2011 жылдары дамыту жоспары бойынша 41 мекеме ашу көзделініп отыр. Солардың ішінде қалыпқа келтіріп, қайтару жолымен- 26 балабақша, мектептерді мектеп-балабақшаға қайта ұйымдастыру жолымен- 3 нысан, ал, 12 нысанды жаңадан салу жоспарланған.
Балабақшаларды қайтарып, қалпына келтіру, күрделі жөндеуге әрине қаржы керек. 2009-2011 жылдары бұған 1 270,8 млн, соның ішінде 2009 жылы 239,9 млн. қажет деп есептелген.
Нысандарды салу республикалық және жергілікті бюджеттердің есебінен жүзеге асырылады. Тарбағатай ауданының Ақсуат ауылында республикалық бюджеттен 150 орындық балабақша салынып жатыр. 3 тоқсанда Семей қаласында 320 орындық балабақшаның құрылысы басталмақшы.
2009-2010 жылдары облыстық бюджеттен 4 балабақша салу жоспарланған : Зайсан қаласында -140 орындық, Катонқарағай ауданының Үлкеннарын ауылында- 140 орындық, Жарма ауданының Шар қаласында – 140 орындық.
4 балабақша мынадай жерлерде : Жарма ауданының Қалбатау (Георгиевка) ауылында- 140 орындық, Күршім ауданының Күршім ауылында – 140 орындық, Шемонаиха ауданының Шемонаиха қаласында – 280 орындық, Семей қаласының Холодный Ключ кентінде – 230 орындық. Бұлардың барлығы «Нұр Отанның» 2009-2010 жылдарға арналған платформасы бойынша қосымша нысандар тізбесіне енгізілген.
Бұдан басқа аудандар мен қалалардың бюджеті есебінен Өскемен қаласының КШТ ауданында 250 орындық, Зырян ауданында 250 және 120 орындық 2 балабақша салу жоспарланып отыр.